Cxu tio signifas, ke junularo kaj AIS estas reciproke neinteresaj? Certe la junularo estas interesa por AIS; cxar gxi ja volas science instrui, kaj por tio necesas studentaro. Inverse, inter la esperantistoj 20- gxis 25-jaraj estas suficxe da studentoj, kiuj sendube povus profiti de partopreno en AIS-konferenco.
Nu, eble tiu cxi artikolo povas brecxi la komunikan baron inter AIS kaj la junaj Esperantistoj. La auxtoro (jam pli ol 40-jara) starigos kelkajn demandojn kaj donos koncizajn respondojn.
La AIS-anoj nomas Esperanton kutime "ILo" = internacia lingvo. La krokodila mondo, kiu (ankoraux) ne parolas ILon, tial estas la sen-IL-uloj.
Sed la anoj de AIS (plejparte) ne sidas en San-Marino. Ili logxas en kvindeko da landoj kaj tie instruas cxe universitatoj, laboras aliloke, aux studas. Aux ili pensiulas (alie la mezuma agxo ja ne povus esti tiom alta).
Por homoj, kiuj volas nur spiri iom da akademia aero dum kelkaj tagoj, tiuj SUS-oj estas ja bona afero. Sed kion faras serioza studento, kiu volas diplomigxi cxe AIS? Nu, li aux sxi devas sekvi kursojn cxe aliaj universitatoj, kie eble instruas iu AIS-profesoro. Aux aliloke, se AIS agnoskas la kurson. Vi certe povas imagi, ke ne estas multaj diplomitoj de AIS.
Pri esploro: AIS ne organizas multe da propra scienca esplorado. La kialo estas simpla: Scienca esplorado kostas multe da mono, kiun AIS ne havas. Preskaux la tuta mono de AIS venas de gxiaj subtenaj membroj, kaj ili estas nur cxirkaux cent. Multaj AIS-anoj ne povas finance permesi al si subtenan membrecon. Do la AIS-anoj povas science esplori nur, se ili profesie laboras en esplorejo, universitato ktp.
Tamen foje AIS sukcesas kunordigi plurlandan esplorprojekton kiun pagas la partoprenantaj institutoj aux aliaj instancoj.
AIS volas por siaj ekzamenoj havi kriteriojn almenaux same severajn kiel la plej severaj sxtataj universitatoj. Tio signifas, ke por magistreco necesas minimume kvarjara studo kaj poste tezo, en kiu la studento solvas ampleksan problemon, kiu postulas fundan scion pri la fako. La tezo estas dulingva (Esperanto kaj gepatra lingvo), kaj la studento devas defendi gxin per prelego (en Esperanto) kaj diskuto kun ekzamenkomitato.
Por doktorigxi necesas memstare solvi nesolvitan sciencan problemon kaj tiel kontribui al la scienca sciaro. Do, se vi volas nur belaspektan diplomon, prefere faru Esperanto-ekzamenon. Sed se vi serioze interesigxas pri internacia scienca diplomo, venu al AIS. Se vi jam posedas diplomon de alia institucio, AIS cetere agnoskos grandan parton de viaj studoj, sed tamen insistos pri la ekzameno!
La finaj ekzamenoj estas publikaj, do estontaj kandidatoj povas vidi kio atendas ilin.
SUS dauxras kutime unu semajnon. Partopreni en SUS rajtas cxiu ajn. Por kompreni la prelegojn estas bone havi maturec-ekzamenon kaj kompreni Esperanton, sed tio ne estas kondicxo por partopreni. AIS nur volas havi partoprenkotizon, kiu momente estas 37,50 DEM. Se iu SUS okazas en reform-euxropa lando (ekzemple dum kaj post la UK en Prago), kutime estas alta rabato por homoj el tiuj landoj.
Cxiun septembron okazas SUS en aux proksime de San-Marino. Tiutempe okazas ankaux la nacia festo kun grandaj spektakloj, kiuj estas bela kadra programo. Cxi-jare la prelega programo (ek de la dua de septembro) okazas en la proksima Rimini (en Italio, 20 km de San-Marino), nur la ekzamena tago estos en SM. Tio havas du avantagxojn: AIS en Rimini havas malmultekostan konferencejon (en lernejo "Dante Alighieri"), kaj la SUS-anoj havas malmultekostajn eblecojn por logxado, ekzemple en junulgastejo. (Tria avantagxo estas, ke la plagxo estas pli proksima.)